Сайн байна уу,

Намайг Уянга гэдэг. Сэтгэлзүйн мэргэжлийг би 2010 оноос хойш нийтдээ 10 жил суралцаж, судалсаар иржээ. Миний хувьд энэ мэргэжлээр хамгийн анх өөрийгөө ойлгох таних зорилгоор сурж эхэлсэн юм. Би Туркт Истанбулын их сургуульд сэтгэл судлалын баклавар зэргийг  2014 онд хамгаалж үргэлжлүүлэн Недерландад Маастриктийн их сургуульд тархи судлалаар магистрын зэргийг 2015 онд дүүргэн Монголд ирж Сэтгэл судлалын үндэсний төвд сэтгэлзүйчээр орон сэтгэлзүйн зөвлөгөө өгөх анхны гараагаа эхэлсэн. Туршлага хуримтлуулах тусам би сэтгэлзүйн мэргэжилд улам хайртай болж, олон хүнд сэтгэлзүйн мэдлэг, мэдээллийг хүргэхийг зорих болсон юм. Тиймээс 2018 онд Амьдралын сургууль нэртэй төрийн бус байгууллагаа байгуулан сэтгэлзүйн зөвлөгөө болон сургалтуудыг явуулж байгаа билээ. Өнөөдөр миний өдөр тутмын гол зорилго бас асуулт бол "Би хүмүүст хэрхэн аз жаргалтай, амар амгалан амьдрахад туслах вэ? юм. Энэ асуултын хүрээнд өөрийгөө өдөр бүр мэргэшүүлж, шинжлэх ухаан, гүн ухаан дээр суурилсан үнэ цэнэтэй зөвлөгөө болон эмчилгээг хүргэхийг зорьж байгаа билээ.

Боловсрол & Туршлага

2010-2014 он Истанбулын их сургууль, сэтгэл судлалын баклавар

2014-2015 он Маастриктийн их сургууль, танин мэдэхүйн нейросайнс

2015-2016 он Сэтгэл судлалын үндэсний төв, сэтгэлзүйч

2016-2017 он Макс Планк институт, Зочин судлаач

2018-2020 он Амьдралын сургууль, Рехамед клиник сэтгэлзүйч

 

Сэтгэлзүйн зөвлөгөөний арга барил

Миний зөвлөгөөний арга барил нь барууны сэтгэлзүйн шинжлэх ухаан болон буддын гүн ухаанд суурилсан. Хүн бол байгалийн хамгийн гайхалтай бас баялаг бүтээлүүдийн нэг юм. Би хүнийг бие физиологи, өссөн орчин болон нийгэм, сэтгэлзүйн онцлог, мөн чанар гээд олон талаас нь харж түүн дээр тулгуурлан зөвлөгөөгөө өгдөг. Тиймээс ч арга барил маань бие дээр тулгуурласан дасгалууд, бодол-зан үйлийг өөрчлөх харилцан яриа болон бясалгалын арга техникүүдээс бүрддэг.